Ada barang ilang dikos en ada lai barang-barang laeng yang seng tau bisa ilang tanpa jejak kayak sampo, handok, calana panjang, deng kacamata, "kacamata" kalo ada yang mangarti ya sudah buat diri sandiri saja, kalo ada yang tar mangarti tinggal tanya beta saja di komen ka seng message saja. XD
So, ada carita bagini ana-ana kos su mulai pastiu deng peristiwa kehilangan ini terjadi diskusi dibawah di depan kamar depan yang deka deng ruang tamu. (Inga: ruang tamu kos ini par samua seng nona seng nyong-nyong ganteng.) Kebetulan tamang kos pung tamang-tamang dong ada datang maeng di kos tapi yang pung kamar dapan tar sadar jadi terjadilah percakapan berikut:
A: Weh X! Beta pung barang ilang kombali lai.
X: Iyo e kk. Masa tiap kali katong bacuci baju akang baju bisa ilang tu!
A: itu dia.
X: tapi kk lia do beta seng parna cuci gabung deng orang laeng punya kanapa beta pung barang bisa ilang tu!
A: He?? se pung barang apa yang ilang?
X: Ngaaa! Beta pung kacamata itam beta ada gantong bae-bae di depan kamar akang bisa ilang tu! (deng suara menggelegar)
A: Kacamata? Lha memang sapa mo pi pake ju?
X: (muka su takisu) iyoo, masa akang yang kacil seksi bagitu bisa ilang tu emang di kos ne ada yang punya kacil bagitu laaa pi ambel beta punya?
A: (shock stengah mampos dengar akang) hahahahaha! se su talalu lai iyo se pung yang paleng kacil jadi. hahahahaaaee!
X: yang ambel to, dia pung barang bagatal ee!!!!
Tiba-tiba dari ruang tamu Y batarea: wei X jang batarea sambarang ada orang dibawah ni!
A: (kaget mata tabuka lebar) weh ada orang dibawah la katong bicara masalah bagini ni?
X: (karna su malu deng marah jadi satu angka lai) tuangaaaaa kas tinggal beta pung seksi! mau apa!!
Ada nyong 2 dibawah su cuma bisa katawa dengar percakapan tadi. Jang harap beta kas tunju muka didepan dong lai. Adoh!
No comments:
Post a Comment